لاہور( نمائندہ جسارت) نائب امیر جماعت اسلامی پاکستان و سیکرٹری جنرل ملی یکجہتی کونسل لیاقت بلوچ نے کہا ہے کہ جماعت اسلامی کے قائدین اور کارکنان کو ہر خطرہ مول لے کر عوام کو متحرک اور منظم کرناہے ۔ حکومت اندرونی فساد ، نااہلی اور ناکامیوں کی وجہ سے بلدیاتی انتخابات سے فرار کا راستہ اختیار کر چکی ہے ۔ بااختیار بلدیاتی نظام اور آزاد انہ انتخابی نظام کے ذریعے ہی عوامی اعتماد بحال ہوسکتاہے ۔ ملک بھر میں جماعت ا سلامی کی ضلعی سیاسی کمیٹیاں بلدیاتی اور عام انتخابات کے امیدواران کو متحرک کریں اور عوامی مسائل پر عوام کے جذبات کی ترجمان بنیں ۔ راولپنڈی میں سیاسی کمیٹی کے عہدے داران سے ملاقات میں گفتگو کرتے ہوئے لیاقت بلوچ نے کہاکہ پاکستان کی کوئی بھی سیاسی جمہوری قوت و قیادت ریاست کے اداروں کے خلاف نہیں ۔ اب پوری قوم کا ایک ہی مطالبہ ہے کہ اسٹیبلشمنٹ سیاست ، انتخابات کی انجینئرنگ سے اپنا کردار
ختم کردے ۔ قومی سلامتی کے لیے افواج پاکستان کی قربانیاں پوری قوم کے لیے قابل فخر ہیں ۔ عوامی مطالبے کو افواج پاکستان کے خلاف رخ دینا فوج اور عوام میں بے اعتمادی کی خلیج کو اور زیادہ بڑھا دے گا ۔ لیاقت بلوچ نے کہاکہ اسلامی جمہوری ملک پاکستان کے بحرانوں کا علاج اسلام اور آئین کی بالادستی میں ہی ممکن ہے ۔ فرقہ پرستی اور مسالک کے ماننے والوں میں شدت پسندی کے اسباب کے لیے علما و مشائخ کلیدی کردار ادا کریں ۔ذاتی ، گروہی ، علاقائی ، فسطائی نظام کا خاتمہ ملکی استحکام کے لیے ضروری ہے ۔ اسلام کے معاشی نظام کا نفاذ ، سود کا خاتمہ ، قرضوں کی لعنت سے چھٹکارا اور کشکول کی معیشت کے شکنجے کو توڑنا وقت کی اہم ترین ضرورت بن گیاہے ۔ عوام کو ہی نہیں ، ریاست ، حکومت اور سیاست کو آئین کی حدود کا پابند رہنا چاہیے ۔ ریاستی اداروں کی لاقانونیت ملک میں انارکی پیدا کرتی ہے ۔
