وزیراعظم عمران خان کا کہنا ہے کہ عالمی برادری نفرت انگیز مواد، انتہاپسندی کا سد باب کرنے کیلئے ضروری اقدامات اٹھائے، کینیڈا میں پاکستانی نژاد خاندان کے قتل پر پاکستانی عوام کو سخت دھچکہ لگا ہے، اس گھناؤنے فعل کے خلاف سخت ترین کاروائی لازمی ہے۔
وزیراعظم عمران خان نے کینیڈین چینل کو انٹرویو دیتے ہوئے کہا کہ نفرت انگیز ویب سائٹس ہیں جو انسانوں میں نفرت پیدا کرتی ہیں، ان ویب سائٹس کے خلاف بین الاقوامی سطح پر کارروائی ہونی چاہیے، کینیڈا کے وزیراعظم سے یہ معاملہ اٹھایا ہے، کینیڈین وزیراعظم اسلامو فوبیا سے لڑنے کی اہمیت سمجھتے ہیں، ، دیگر عالمی رہنماوَں کی طرف سے اس معاملے پر موثر ردعمل سامنے نہیں آیا۔
انہوں نے بتایا کہ بعض حلقے ان ویب سائٹس کے ذریعے نفرت انگیز مواد پھیلا کر انسانیت کا بٹوارا کرنا چاہتے ہیں، مغربی ممالک کے بعض رہنماؤں کو معاملے کی سنگینی کا احساس تک نہیں، ویب سائٹس کے خلاف بین الاقوامی سطح پر کارروائی ہونی چاہیے، عالمی برادری آن لائن نفرت انگیزمواد ،انتہا پسندی روکنے کے اقدامات کرے۔
