منامہ (انٹرنیشنل ڈیسک) اسرائیلی وزیر اعظم بحرین پہنچ گئے، جہاں انہیں شاہی پروٹوکول دے کر استقبال کیا گیا۔ خبررساں اداروں کے مطابق منامہ پہنچنے پر اسرائیلی وزیر اعظم نفتالی بینیت شاہ بحرین حمد بن عیسیٰ اور ولی عہد سلمان بن حمد خلیفہ سے ملاقات کی۔ دونوں ممالک کے درمیان اس دورے کے دورا ن اہم معاہدوں کی توقع کی جارہی ہے۔ اسرائیل اور بحرین کے درمیان 2020 ء میں باضابطہ سفارتی تعلقات قائم ہونے کے بعد دونوں ملکوں کے مابین یہ پہلی اعلی سطحی بات چیت ہے۔ دونوں ممالک نے امریکا کی حمایت سے معاہدہ ابراہیمی کے حصے کے طور پر اپنے سفارتی تعلقات قائم کیے تھے۔ منامہ روانہ ہونے سے قبل اسرائیلی وزیر اعظم نے بتایا تھا کہ وہ شاہ بحرین سے ملاقات کے لیے جارہے ہیں اور ان کا مقصدخیر سگالی کا پیغام پہنچانا ہے۔
