مقبوضہ بیت المقدس (انٹرنیشنل ڈیسک) صحافیوں کے حقوق کے لیے کام کرنے والے ادارے جرنلسٹس سپورٹ کمیٹی (جے ایس سی) نے کہا ہے کہ اسرائیلی فورسز نے گزشتہ سال کے دوران فلسطینی صحافیوں کے خلاف 260 سے زیادہ حملے کیے ہیں۔ رپورت میں کہا ہے کہ اسرائیلی فورسز نے مقبوضہ مغربی کنارے اور مقبوضہ بیت المقدس کے محلوں کے ساتھ ساتھ محاصرہ زدہ غزہ کی پٹی میں بھی صحافیوں کو نشانہ بنایا۔ جرنلسٹس سپورٹ کمیٹی نے اپنے بیان میں کہا کہ گزشتہ سال کے دوران اسرائیلی تشدد سے فلسطینی صحافیوں کی ایک بڑی تعداد زخمی ہوئی ،جب کہ بعض واقعات میں تشدد کے باعث مستقل معذوری کا شکار بھی ہوئے۔ اسرائیلی افواج فلسطینی شہریوں اور بالخصوص صحافیوں کے خلاف بین الاقوامی قانون کے تحت ممنوع گولہ بارود کا استعمال روزانہ کی بنیاد پر کرتی ہیں۔ فلسطینی صحافی عوام کے خلاف اسرائیلی حکومت کے جرائم کو بے نقاب کرتے ہیں،جس کی انہیں سزا دی جاتی ہے۔
