نیویارک: اقوام متحدہ نے خبردار کیا ہے کہ مغربی افریقہ کے ساحل خطے میں ایک کروڑ اسی لاکھ افراد کو آئندہ تین ماہ کے دوران خوراک کی شدید قلت کا سامنا ہوگا۔ میڈیا رپورٹس کے مطابق عالمی ادارے کے ورلڈ فوڈ پروگرام نے بتایا کہ کچھ علاقوں کے لیے پہلے ہی راشن میں کٹوتی کی جا چکی ہے اور اگر بین الاقوامی عطیہ دہندگان مزید امداد نہیں فراہم کرسکے تو اس میں مزید کمی آجائے گی۔
ادارے کے ترجمان ژینس لائرک کے مطابق ساحل خطے میں پانچ سال سے کم عمر کے 77 لاکھ بچے غذائی قلت کا شکار ہونے کا خدشہ ہے۔ ان کے مطابق برکینا فاسو، چاڈ، مالی اور نائجر جیسے افریقی ممالک میں صورتحال انتہائی تشویشناک حد تک پہنچ چکی ہے۔ اقوام متحدہ نے ان چاروں ممالک کے لیے تیس ملین ڈالر کی ہنگامی امداد کا اعلان کیا ہے۔ ساحل خطے کو سن 2011 سے خشک ترین حالات کا سامنا ہے۔
