اسلام آباد: وزیراعظم شہبازشریف نے کہا ہے کہ حکومت نے حالات کی ضرورت کے تحت مشکل فیصلے کئے ہیں لیکن جلد ہی ملک کو اس صورتحال سے کامیابی سے نکال لیا جائے گا۔
بدھ کومتعدد ٹویٹس میں انہوں نے کہا کہ حکومت نے عوام کا بوجھ کم کرنے کے لئے کفایت شعاری کے اقدامات متعارف کروائے ہیں۔ وزیراعظم نے پری بجٹ کانفرنس میں بھرپور شرکت پر زرعی ماہرین، معیشت دانوں، تاجروں، آئی ٹی اور معاشی ماہرین کا شکریہ ادا کیا۔
شہبازشریف نے کہا کہ کانفرنس نے اقتصادی چیلنجوں اور ان سے نمٹنے پر تبادلہ خیال کے لئے جامع پلیٹ فارم مہیا کیا۔ وزیراعظم نے کہا کہ قومی معیشت میں تبدیلی کے لئے انفارمیشن ٹیکنالوجی اور زراعت کے شعبے میں موثر پالیسیاں بنانے کی ضرورت ہے۔
شہبازشریف نے کہا کہ اپنے بیرونی دوروں کے دوران انہوں نے آئی ٹی، کامرس، مالیات، توانائی، بنیادی ڈھانچے اور سرمایہ کاری جیسے باہمی تعاون کے شعبوں کو ترجیح دی۔
