مسلم لیگ کے دو اہم رہنمائوں سردار ایاز صادق اور سلمان رفیق نے 17 جولائی کو پنجاب میں ہونے والے ضمنی انتخابات کی مہم سازی میں حصہ لینے کیلئے اپنی وزارتوں سے استعفیٰ دیدیا ہے۔
خیال رہے کہ پنجاب اسمبلی کی 20 نشستوں پر ضمنی الیکشن رواں ماہ کی 17 تاریخ کو ہونا ہیں۔ یہ نشستیں تحریک انصاف کے منحرف اراکین کو الیکشن کمیشن کی جانب سے ڈی سیٹ کیے جانے کے بعد خالی ہوئی ہیں۔
وفاقی وزیر ایاز صادق کی جانب سے استعفیٰ وزیراعظم کو بھجوا دیا گیا ہے۔ انہوں نے استعفے میں موقف اختیار کیا ہے کہ وہ ذاتی وجوہات کی وجہ سے اپنی وزارت سے استعفیٰ دے رہے ہیں۔
دوسری جانب صوبائی وزیر خواجہ سلمان رفیق بھی اپنے عہدے سے استعفی دیدیا ہے۔ انہوں نے وزیراعلیٰ پنجاب حمزہ شہباز کے نام اپنے استعفے میں کہا کہ وہ بھی ذاتی وجوہات اور مصروفیات کے باعث وزارت چھوڑ رہے ہیں۔
مسلم لیگ ن متحد ہے اور بےجا افواہوں پر کان نا دھرے جائیں۔
میں اور ایاز صادق صاحب الیکشن مہم میں حصہ لینے کی وجہ سے وزارتوں سے مستعفی ہوئے۔
الیکشن کمیشن کے ضابطہ اخلاق کی خلاف ورزی مسلم لیگ ن کا شیوہ نہیں ہے۔
— Khawaja Salman Rafique (@SalmanRafiquePK) July 9, 2022
خواجہ سلمان رفیق نے اس حوالے سے ایک ٹویٹ بھی کی جس میں انہوں نے لکھا کہ بے جا افواہوں پر کان نہ دھرے جائیں۔ مسلم لیگ (ن) متحد ہے۔ میں اور سردار ایاز صادق ضمنی الیکشن مہم میں حصہ لینے کی وجہ سے وزارتوں سے مستعفی ہوئے ہیں۔ لیگی رہنما کا کہنا تھا کہ الیکشن کمیشن کے ضابطہ اخلاق کی خلاف ورزی مسلم لیگ ن کا شیوہ نہیں ہے۔
دوسری جانب وفاقی وزیر برائے ریلوے و ہوا بازی خواجہ سعد رفیق نے ایک بیان میں کہا ہے کہ مسلم لیگ ن نواز شریف کی قیادت میں سیسہ پلاٸی دیوار کی مانند متحد ہے۔ ان کا کہنا تھا کہ ایاز صادق اور سلمان رفیق نے ضمنی انتخابات کی مہم چلانے کے لیے اپنی وزارتوں سے استعفے دیے۔ ’انشااللّٰہ جلد واپس آ کر اپنی وزارتی ذمہ داریاں سنبھال لیں گے۔
