لاہور : وفاقی وزیر داخلہ رانا ثنا اللہ نے پنجاب اسمبلی میں ووٹنگ کے بعد حمزہ شہباز کے وزیراعلیٰ پنجاب کے عہدے پر برقرار رہنے کے اعلان کے بعد میڈیا سے گفتگو کرتے ہوئے کہا کہ غرور میں ڈوبے لوگوں نے دھمکیاں دیں، اللہ تعالیٰ کو غرور اور تکبر ہرگز پسند نہیں۔
پریس کانفرنس کرتے ہوئے وفاقی وزیر کا کہنا تھا کہ اللہ ٰ نے ہمیں سرخرو کرنے اور ان فسادیوں کو رسوا کرنے کا فیصلہ کیا۔ چودھری شجاعت کے فیصلے نے ملک کو عمرانی فتنے سے بچا لیا۔ اتحادی جماعتوں کی تمام قیادت چودھری شجاعت کے فیصلے کو سراہتی ہے، حمزہ شہباز دوبارہ اکثریت حاصل کر کے کامیاب ہوئے۔
انہوں نے کہا کہ ترقی، رواداری اور احترام کی سیاست چاہنے والوں کی دعائیں شامل ہیں، آپ نے جو کرنا ہے،کروانا ہے کریں، ہم آپ کو روک کر دکھائیں گے، ہم آپ کو قانون کا سبق ازبر کروائیں گے، امن خراب کرنے کی کوشش کی گئی تو سختی سے نمٹا جائے گا۔
