اسلام آباد: پاکستان پیپلزپارٹی کے چیئرمین اور وزیر خارجہ بلاول بھٹو نے پنجاب اسمبلی میں حمزہ شہباز کے وزیر اعلیٰ برقرا رہنے پر ایک زرداری سب پر بھاری کا نعرہ لگا دیا۔
بلاول بھٹو نے پنجاب اسمبلی میں ہونے والے اپ سیٹ کے بعد سماجی رابطے کی سائٹ ٹویٹر پر اپنے ایک بیان میں ’ایک زرداری سب پہ بھاری لکھا‘۔
آصف زرداری کی گزشتہ روز دو بار مسلم لیگ ق کے سربراہ چوہدری شجاعت حسین سے کئی گھنٹے طویل ملاقات ہوئی تھی جس کے بعد دونوں طرف سے کسی بھی قسم کا اعلامیہ جاری نہیں کیا گیا تھا۔
Aik Zardari Sab Pe Bhaari
— BilawalBhuttoZardari (@BBhuttoZardari) July 22, 2022
ذرائع کا کہنا ہے کہ آصف علی زرداری سے ہونے والی ملاقاتوں کی وجہ سے ہی چوہدری شجاعت نے ڈپٹی اسپیکر کو بطور پارٹی سربراہ خط لکھا اور پھر اس پر ڈپٹی اسپیکر نے رولنگ دی، جس کے نتیجے میں حکومتی اتحاد کے نامزد کردہ امیدوار حمزہ شہباز کی کامیابی ممکن ہو سکی۔
واضح رہے کہ ڈپٹی اسپیکر نے چوہدری شجاعت کے خط پر آئینی اختیار کا استعمال کرتے ہوئے مسلم لیگ ق کے دس اراکین کے ووٹ مسترد کیے جس کے پرویز الہیٰ صرف 176 ووٹ حاصل کرسکے اور تین ووٹوں کے فرق سے حمزہ شہباز کامیاب قرار پائے۔
