لاہور: لاہور کی خصوصی عدالت نے وزیراعظم شہبازشریف اور ان کے صاحبزادوں حمزہ شہباز اور سلیمان کے خلاف منی لانڈرنگ کی سماعت کا تحریری حکم نامہ جاری کردیا ہے۔
اسپیشل سینٹرل عدالت نے گزشتہ سماعت کا 9صفحات کا تحریری فیصلہ جاری کرتے ہوئے وزیراعظم کے بیٹے سلیمان شہباز کے مقولہ اور غیر منقولہ ملکیتی اثاثے قرق کردئیے ہیں۔
تحریری حکمنامے میں کہا گیا ہے کہ سلیمان شہباز کی چنیوٹ میں 200کنال زرعی اراضی قرق کردی گئی ہے اور ان کی قرقی کا آرڈر ڈپٹی کمشنر چنیوٹ کو بھیج دیا گیا ہے۔عدالت نے سلیمان شہباز کے 13کمپنیوں کے شیئرز اور 29بینک اکانٹس کو بھی قرق کرنے کا حکم دیا ہے۔
عدالت نے حکم دیا ہے کہ تفتیشی افسر سلیمان شہباز کی دیگر جائیدادوں کی تفصیلات بھی عدالت کو پیش کرے۔عدالت نے وزیراعظم شہبازشریف اور ان کے بیٹے حمزہ شہباز کو فرد جرم عائد کرنے کے لئے آئندہ سماعت پر ذاتی حیثیت میں طلب کرلیا ہے۔
دو روز قبل ہی وزیراعظم شہباز شریف کے صاحبزادے سلیمان شہباز کی جائیدادوں کی تفصیلات منظر عام پر آئی تھیں۔
