اسلام آباد: وفاقی حکومت نے تمام اہم اور حساس دفاتر و اداروں کی سائبر سیکورٹی یقینی بنانے کا اصولی فیصلہ کرلیا جس کے لیے وزارت انفارميشن ٹيکنالوجی نے سائبر سیکورٹی رولز تیار کرلیے ہیں۔
وزارت انفارمیشن ٹیکنالوجی ذرائع کا کہنا ہے کہ ان رولز کا بنیادی مقصد سائبر سیکورٹی کو یقینی بنانا ہے تاکہ وزیراعظم آفس سے آڈيو ليک ہونے کے بعد مستقبل میں ایسے واقعات کے روک تھام کی جاسکے۔
وزارت آئی ٹی حکام کے مطابق سرکاری ڈیٹا کے تحفظ کے لیے اداروں کو قبل از وقت الرٹ جاری ہوگا۔ حکام کے مطابق سیکورٹی رولز انکوائری کميٹی کی سفارشات کی روشنی ميں بنائے گئے ہیں اور ان رولز کا مسودہ بھی تمام اسٹیک ہولڈرز کے ساتھ شیئر کردیا ہے اور انہیں کہا گیا ہے کہ ان مجوزہ رولز ہر اپنی آرا و تجاویز دی جائیں۔
اس حوالے سے بتایا گیا کہ ان تجاویز و اعتراضات کی روشنی میں مسودے کو حتمی شکل دے کر منظوری کیلئے پیش کیا جاسکے۔ حکام کے مطابق انکوائری کمیٹی وزیراعظم آفس میں آڈیو لیکس کے بعد بنائی گئی تھی جس نے اہم دفاتر میں سائبر سیکورٹی سے متعلق خامیوں کی نشاندہی کی۔
