کراچی: صوبائی وزیر اطلاعات اور ٹرانسپورٹ و ماس ٹرانزٹ شرجیل انعام میمن نے کہا ہے کہ عمران خان کو مفتا لگا ہوا ہے، جب سے ان کی پنجاب میں حکومت بنی ہے، بنی گالا ویران ہو گیا ہے۔
شرجیل میمن نے کہاکہ عمران خان نے پنجاب میں ڈیرے ڈالے ہوئے ہیں ، زمان پارک کا کھانا بھی پنجاب کے وزیر اعلی ہاس سے آتا ہے ، عمران خان آخری دم تک حکومت نہیں چھوڑیں گے۔
انہوں نے کہا کہ ان کی ذاتی را ئے ہے کہ عمران خان پنجاب اور خیبرپختونخوا کی اسمبلیاں نہیں توڑیں گے ۔ گوگیوں کے کہنے پر پنجاب کابینہ میں 15 ، 15 روز کے لئے وزرا اٹھائے جا رہے ہیں تاکہ وہ اپنے ٹارگٹ پورے کر سکیں۔
صوبائی وزیر کا کہنا تھا کہ یہ بات سمجھ سے بالاتر ہے کہ ایک طرف اسمبلیاں ختم کرنا چاہتے ہیں تو دوسری جانب کابینہ میں توسیع کی جا رہی ہے، عدم اعتماد کی تحریک کے دوران عمران خان اپنی حکومت بچانے کے لیے تمام حربے استعمال کئے۔ کبھی قومی اسمبلی کی بجلی بند کر دیتے تھے ۔یہ صاحب آخری نو گھنٹوں میں ہر حد تک چلے گئے ۔
انہوں نے کہاکہ غیر قانونی طور پر قومی اسمبلی تک توڑ دی ۔ اس وجہ سے عمران خان ایسا کوئی کام نہیں کریں گے ، جس سے ان کا مفتا بند ہوجائے، عمران خان نے ملک کو ناقابلِ تلافی نقصان پہنچایا ہے ۔ اس وقت ملک میں مہنگائی کا طوفان برپا ہے۔ عوام معاشی صورتحال سے سخت پریشان ہیں۔ اس صورتحال کی تمام تر ذمہ داری عمران خان پر عائد ہوتی ہے ۔
