لاہور: پاکستان کرکٹ بورڈ (پی سی بی) کی مینجمنٹ کمیٹی کے اجلاس میں سابق کپتان شاہد آفریدی کو محمد وسیم کی جگہ نیا چیف سلیکٹر مقرر کرنے کی منظوری دے دی گئی ہے۔
بورڈ ترجمان کے مطابق شاہد آفریدی کے ساتھ سابق ٹیسٹ کرکٹر عبدالرزاق اور راؤ افتخار انجم سلیکشن کمیٹی کا حصہ ہوں گے۔ مینجمنٹ کمیٹی کے ممبر ہارون رشید بطور کنوینر سلیکشن کمیٹی کی معاونت کریں گے۔
سلیکشن کمیٹی فی الوقت نیوزی لینڈ کے خلاف ون ڈے ٹیم کا اعلان کرے گی۔ ون ڈے میچز 10، 12 اور 14 دسمبر کو کراچی میں شیڈول ہیں، جنہیں تبدیل کرکے 9، 11 اور 13 جنوری میں تبدیل کردیا گیا ہے۔ون ڈے سیریز مکمل ہونے کے بعد پاکستان کرکٹ ٹیم کی اگلی سیریز مئی میں طے ہے۔ اس لیے سلیکشن کمیٹی کی باقاعدہ تقرری پی ایس ایل کے بعد ہوگی۔
