اسلام آباد: حکومت نے چھوٹی گاڑیوں کی تیاری کے لیے آلات کی درآمد پر کسٹم ڈیوٹی میں کمی کر دی ہے۔
ریونیو ڈویژن کی جانب سے جاری ترمیمی نوٹیفکیشن کے مطابق ایک ہزار سی سی تک نئے ماڈل کی گاڑیوں کی تیاری کے لیے آلات کی درآمد پر کسٹمز ڈیوٹی کم کرکے 15 فیصد کردی گئی ہے۔
ایک ہزار سی سی تک نئے ماڈل کی گاڑیوں کی ٹائر ٹیوب پر کسٹم ڈیوٹی 25 فیصد سے کم کرکے 16 فیصد کردی گئی جب کہ ایک ہزار سی سی تک پرانے ماڈل کی گاڑیوں کی تیاری کے لیے آلات کی درآمد پر کسٹمز ڈیوٹی32.5 فیصد سے کم کرکے30فیصد کردی گئی۔
نوٹیفکیشن کے مطابق ایک ہزار سی سی تک کی گاڑیوں کے آلات کی درآمدپر کسٹمز ڈیوٹی کی شرح میں کمی 3 سال تک کے لیے کی گئی ہے۔ کسٹمز ڈیوٹی کی شرح میں کمی انجنیئرنگ ڈویلپمنٹ بورڈ کی سرٹیفائڈ نئے ماڈل کی گاڑیوں کے لیے کی گئی ہے۔
