لاہور: امیر جماعت اسلامی پنجاب وسطی محمد جاوید قصوری نے کراچی میں بلدیاتی انتخابات کے نتائج میں غیر ضروری تاخیر پر اپنا ردعمل دیتے ہوئے کہا ہے کہ کراچی میں بلدیاتی انتخابات کے دوران جماعت اسلامی کے کارکنوں پر تشدد قابل مذمت ہے، نتائج میں تاخیر درحقیقت جماعت اسلامی کا مینڈیٹ چرانے اور اکثریت کو اقلیت میں بدلنے کی سازش ہے۔
محمد جاوید قصوری نے کہاکہ شہر قائد کے باسیوں نے جماعت اسلامی پر اعتماد کا اظہار کر دیا ہے ،اپنی ناکامی کو چھپانے کے لئے سند ھ حکومت اوچھے ہتھکنڈوں کا مظاہرہ کر رہی ہے، وہ وقت دور نہیں جب کراچی سے کامیابی کا شروع ہونے والا سفر پنجاب سمیت پورے ملک میں پھیلے گا ۔
انہوں نے کہاکہ جماعت اسلامی نے ہمیشہ خدمت خلق کی سیاست کی ہے ، ہم سمجھتے ہیں اقتدار صرف عوام کی خدمت کا نام ہے ، جو لوگ عوام کو گمراہ کر کے اقتدار پر قابض ہوتے رہے ہیں آج وہ سب بے نقاب ہو چکے ہیں ۔کراچی سے جماعت اسلامی کے کارکنوں کو ٹھڈی ہوائیں آرہی ہیں ۔
