کراچی:پاکستان ریڈ کریسنٹ سندھ اور سندھ بوائے اسکاؤٹس ایسوسی ایشن کے تعاون سے العابد ایجوکیشنل سوسائٹی نے 27 اور 28 فروری 2023 کو کراچی کے گلستان اسکاؤٹس گراؤنڈ میں طالبات کے لیے دوسرے سالانہ دو روزہ فیلڈ ٹریننگ کیمپ کا انعقاد کیا، کراچی بھر سے 350 سے زائد طالبات نے حصہ لیا۔
دوروزہ فیلڈ ٹریننگ کیمپ کا اس سال کا تھیم ’’ستاروں سے آگے جہاں اور بھی ہيں‘‘ رکھا گیا تھا۔ بروز منگل 28 فروری کیمپ کی اختتامی تقریب کے بعد جاری ہونے والی پریس ریلیز کے مطابق کیمپ کا بنیادی مقصد طالبات کو کسی بھی ہنگامی صورتحال یا آفت جیسے مشکل حالات میں جینے کا اعتماد اور حوصلہ دینا اور انہیں نازک سے مضبوط میں تبدیل کرنا تھا۔
تمام طالبات کو فاطمہ جناح کمپنی، رانا لیاقت علی کمپنی، بلقیس ایدھی کمپنی، اور رتفاؤ کمپنی کے نام سے چار کمپنیوں میں رکھا گیا تاکہ ان خواتین کو خراج تحسین پیش کیا جا سکے۔
اختتامی تقریب کی مہمان خصوصی چیئرپرسن پاکستان ریڈ کریسنٹ سندھ مسز فرزانہ نائیک نے اپنے خطاب میں طالبات کے لیے کیمپ کے انعقاد پر العابد ایجوکیشنل سوسائٹی کی انتظامیہ کی کاوشوں کو سراہا۔
چیئرپرسن نے کہا کہ میں ان طلباء کے والدین کو سلام پیش کرتا ہوں جنہوں نے اپنے بچوں کو اس کیمپ میں شرکت کی اجازت دی اور ان کی حوصلہ افزائی کی۔انہوں نے مزید کہا کہ لڑکیاں بھی معاشرے کی اہم فرد ہیں اور ان کی ہر طرح کی تربیت ہماری ذمہ داری ہے۔
فرزانہ نائیک نے کہا کہ ہلال احمر نے کیمپ کے انتظام اور قواعد، ابتدائی طبی امداد، ہنگامی ردعمل، موسمیاتی تبدیلی، اور آگ سے حفاظت کے بارے میں تربیتی سیشنز کا انعقاد کیا۔ اس کے علاوہ کسی بھی ہنگامی صورتحال سے نمٹنے کے لیے 24 گھنٹے فرسٹ ایڈ پوسٹ بھی قائم کی گئی۔
