لاہور: مسلم لیگ ن کی چیف آرگنائزر مریم نواز اور وفاقی وزیر خزانہ اسحاق ڈار نے ملکی تباہی کا ذمے دار عمران خان کو قرار دیتے ہوئے سابق وزیراعظم کےٹوئٹر بیانات کی سخت الفاظ میں مذمت کی ہے۔
ن لیگ کی سینئر نائب صدر مریم نواز نے چیئرمین پی ٹی آئی کو تنقید کا نشانہ بناتے ہوئے کہا کہ تمہاری بے رحم لوٹ مار، نااہلی، غلط ترجیحات، آئی ایم ایف کے ساتھ ظالمانہ ڈیل اور اس کی خلاف ورزی نےپاکستان کو معاشی بدحالی کی راہ پر ڈال دیا۔
عمران خان کے ٹوئٹ کا جواب دیتے ہوئے انہوں نے کہا کہ ڈھٹائی دیکھو! وہ لوگ جو تمہاری اس گندگی کو ختم کر رہے ہیں تم اپنا گند ان کے سر ڈال رہے ہو، چپ کر کے بیٹھ جاؤ۔ اس تباہی کے لیے ان تمام لوگوں کا شکریہ ادا کرنا نہ بھولنا جو تمہیں 4 سال تک پالتے رہے اور عدلیہ میں ان کی باقیات کا بھی جن پر تم اب بھروسا کررہے ہو۔ ان شا اللہ ہم ایسا ہونے نہیں دیں گے۔
دوسری جانب وفاقی وزیر خزانہ اسحاق ڈار نے عمران خان کے ٹوئٹ پر جواب دیتے ہوئے کہا کہ معاشی تباہی کا ذمے دار صرف اور صرف عمران خان ہے، جس نے پاکستان کو معاشی تباہی کے دہانے پر لا کھڑا کیا تھا۔
اسحاق ڈار نے کہا کہ اللہ نے پاکستان کی جان تم سے چھڑوا دی، تمہاری کی ہوئی تباہی کو ہم ٹھیک کرنے کی ہر ممکن کوشش کر رہے ہیں، معیشت کےلیے قوم کو جلد اچھی خبریں ملیں گی۔
