لاہور: سابق وزیراعلیٰ پنجاب چودھری پرویزالٰہی نے کہا ہے کہ رانا ثناء اللہ کے بڑے جو لندن میں بیٹھے ہیں اس ٹبر میں کوئی جان نہیں رہ گئی، اب وہ سارا ٹبر بھی آ جائے اس سے عمران خان کو کوئی فرق نہیں پڑنا۔
چوہدری پرویز الہی نے کہا کہ عمران خان کی بات سچ ہے کہ مریم نواز ان کی ٹیم کی بہترین کھلاڑی ہیں، وہ جو بات بھی کرتی ہیں اس سے عمران خان کی سپورٹ اور بڑھ جاتی ہے، مریم نواز اور رانا ثناء اللہ کی مہربانی سے آج کے دن پی ٹی آئی کے تمام ورکروں میں گہما گہمی بڑھ گئی ہے۔
انہوں نے کہاکہ عمران خان پہلے بھی ہر عدالت میں پیش ہوئے ہیں اور اب بھی جا رہے ہیں، جہاں وہ نہیں جا سکے اب چلے جائیں گے اس میں رانا ثنا کو پریشان ہو کر ایسے اوچھے ہتھکنڈے استعمال کرنے کی کیا ضرورت ہے؟
رہنما پی ٹی آئی کا کہنا تھا کہ لاہور میں جو چور بیٹھے ہیں وہ سب بھی محسن نقوی سمیت گھونسلوں میں چھپے ہیں، آئیں اور عمران خان کو پکڑ کر دکھائیں۔
