امریکا کے سابق سفیر زلمے خلیل زاد نے کہا ہے کہ چیئرمین پی ٹی آئی عمران خان کی گرفتاری مزید سیاسی بحران کا سبب بنے گی۔
افغانستان کے لیے امریکا کے سابق خصوصی ایلچی نے اپنے ٹوئٹر بیان میں کہا ہے کہ پاکستان کو اس وقت سیاسی، معاشی اور سیکورٹی جیسے بڑے بحرانوں کا سامنا ہے۔ انہوں نے پاکستان میں جون میں انتخابات کرانے کی تجویز دیتے ہوئے کہا کہ عمران خان کی گرفتاری سے پاکستان میں جاری سیاسی بحران مزید سنگین ہوجائے گا، سیاسی لیڈروں کو جیلوں میں ڈالنا، پھانسی پر لٹکانا یا قتل کرانا غلط روش ہے۔
زلمے خلیل زاد نے مزید کہا کہ پاکستان کی موجودہ صورتحال میں میں 2 تجاویز دیتا ہوں جس میں پہلی یہ کہ جون میں قومی سطح پر انتخابات کا اعلان کیا جائے تاکہ تباہی سے بچا جاسکے۔
زلمے خلیل زاد نے کہا دوسری تجویز یہ ہے کہ اس وقت تمام سیاسی جماعتیں ملک کو بچانے اور استحکام، سلامتی اور خوشحالی کی راہ پر گامزن کرنے کے لیے مل بیٹھ کر مسائل کی نشاندہی اور آئندہ کا لائحہ عمل طے کریں اور جو بھی الیکشن میں کامیاب ہو اسے عوام کا مینڈیٹ حاصل ہوگا اسکو کام کرنے دیا جائے۔
