کراچی: اورنگی ٹاون میں کھلے مین ہول میں گرنے سے خاتون اور مرد جاں بحق ہوگئے۔
ایکسپریس نیوز کے مطابق اورنگی ٹاؤن کے علاقے سیکٹر 14 سی بھاشانی بیکری کے قریب مین ہول میں راہگیر خاتون کھلے مین ہول میں گر گئی جسے دیکھ کر وہاں سے گزرنے والے 2 افراد میں سے ایک شخص خاتون کو بچانے کے لیے مین ہول میں اتر گیا۔
موقع پر موجود افراد نے فوری طور پر پولیس اور ایدھی کے رضا کاروں کو واقعہ سے آگاہ کیا ، ایس ایچ او پاکستان بازار سہیل خاصخیلی کے مطابق مین ہول میں پانی اور زہریلی گیس کی وجہ سے خاتون اور اسے بچانے کے لیے جانے والا شخص دم گھٹنے سے ہلاک ہوگئے جن کی لاشیں ایدھی کے رضا کاروں نے سخت جدوجہد کے بعد باہر نکال کر عباسی شہید اسپتال پہنچائیں۔
پولیس کے مطابق خاتون کی شناخت 48 سالہ رضیہ بیگم کے نام سے کی گئی جو اسی علاقے کی رہائشی ہے جبکہ ہلاک ہونے والے شخص کی فوری طور پر شناخت نہیں ہو سکی اور اس حوالے سے پولیس مزید تحقیقات کر رہی ہے۔
