لاہور: وزیراعظم شہباز شریف نے نئی سیاسی جماعت استحکام پاکستان پارٹی کے سربراہ جہانگیر ترین سے ان کی رہائش گاہ پر جاکر ملاقات کی ہے۔
نجی ٹی وی کی رپورٹ کے مطابق شہباز شریف نے جہانگیر ترین کے بھائی عالمگیر ترین کی وفات پر اظہار تعزیت اور فاتحہ خوانی کی۔ وزیراعظم نے مرحوم کے بلندی درجات اور لواحقین کے لیے صبر جمیل کی دعا کی۔
واضح رہے کہ رواں ماہ کے آغاز میں استحکام پاکستان پارٹی کے پیٹرن انچیف اور معروف کاروباری شخصیت جہانگیر ترین کے بھائی عالمگیر ترین نے گھر میں خودکشی کرلی تھی۔ لاہور پولیس کے مطابق عالمگیر ترین نے پستول سے اپنے سر میں گولی ماری تھی۔
پولیس حکام کا کہنا تھا کہ عالمگیر ترین نے خودکشی سے قبل ایک تحریر بھی چھوڑی جس میں انہوں نے اپنی بیماری اور تکالیف کا ذکر کیا تھا۔
