جماعت اسلامی پاکستان کے امیر سراج الحق نے بجلی کی قیمتوں میں اضافے کے خلاف 2ستمبر کو ہونے والی ہڑتال کو عوام کے دل کی آواز قراردیتے ہوئے کہا ہے کہ اس دن ملک گیر احتجاج بھی کیا جائے گا۔
لاہور میں پریس کانفرنس سے خطاب کرتے ہوئے سراج الحق نے کہا کہ کراچی سے چترال تک ظالمانہ فیصلے کے خلاف عوام متحد ہیں، انہوں نے کہا کہ المیہ یہ ہے کہ آج بھی سینیٹ، وزارتوں میں انگریزوں کا ساتھ دینے والے بیٹھے ہیں،عوام سڑکوں پر نکلیں گے، عوام دشمن فیصلے برداشت اور ہضم کرنے کے قابل نہیں ۔ ملک میں مہنگائی معاشی دہشت گردوں کی وجہ سے ہے. حکمرانوں نے شوگر ملز اور جائیدادوں میں اضافہ کیا. ان کا کہنا تھا کہ اگر کسی قوم پرایٹم بم استعمال ہو تو وہ اٹھ سکتی ہے لیکن اخلاق تباہ ہوجائے تو کبھی نہیں اٹھ سکتی۔
دوسری جانب تاجر برادری نے بجلی کی قیمت میں ناقابل برداشت اضافےپر سخت تنقیدکی ہےاور بجلی مہنگی ہونے کیخلاف کئی شہروں میں لوگوں نے بل بھی جلادیئے ہیں۔
بجلی بلوں میں اضافے کا سبب 40 سے 50 فیصد شامل کیے گئے ٹیکس بنے ہیں۔ مہنگی بجلی ہونے کی وجہ سےصنعتی پیداوار کی لاگت میں 25 سے 30 فیصداضافہ بھی ہوا ہے۔
واضح رہے کہ واپڈا کے گریڈ 17 سے 22 تک افسران کیلیےفری یونٹ ختم کرنے کا فیصلہ کیا گیاہے۔
