اسلام آباد: صدر مملکت ڈاکٹر عارف علوی نے بے روزگاری، معاشرے میں تناؤ کی بڑھتی ہوئی سطح، خصوصی افراد کے لیے مواقع تک رسائی کو بہتر بنانے اور کاروبار اور روزگار میں خواتین کی شرکت کو بڑھانے جیسے چیلنجوں سے نمٹنے کے لیے اجتماعی کوششوں کی ضرورت پر زور دیا ہے۔
ایوان صدر سے جاری ایک پریس ریلیز کے مطابق صدر مملکت نے کراچی چیمبر آف کامرس اینڈ انڈسٹری (کے سی سی آئی) کے ایک وفد سے ملاقات میں ملک میں سماجی و اقتصادی چیلنجوں پر قابو پانے کے لیے رضاکارانہ خدمات اور چیمبرز، بینکنگ سیکٹر اور سول سوسائٹی کی فعال شمولیت کی اہمیت پر زور دیا۔
ڈاکٹر عارف علوی کا کہنا تھا کہ کاروباری برادری کو سماجی شعبوں کو آگے بڑھانے اور ضرورت مندوں کی مدد کرکے اپنی کارپوریٹ سماجی ذمہ داری کو پورا کرنے میں کردار ادا کرنا چاہیے۔
