مظفر آباد: آزاد جموں و کشمیر میں پچھلے دنوں سے جاری بارشوں اور برف باری کا سلسلہ رک گیا، تاہم سرد موسم کی شدت میں اضافہ ہوگیا ہے۔
خبر رساں اداروں کے مطابق کئی دن سے وقفے وقفے سے جاری بارش کے سلسلے اور اس پر برف باری کے بعد آزاد کشمیر کے دارالحکومت مظفر آباد سمیت کئی علاقوں کا حسن دوبالا ہوگیا اور موسم خوشگوار ہونے سے ملک بھر سے سیاح جنت نظیر علاقوں کا رخ کرنے لگے ہیں۔
مظفر آباد کے پہاڑی سلسلوں کوہ مکڑہ، پیر چناسی، پیر ہسی مار نے برف کی چادر اوڑھ لی ہے، جس سے قدرت کی تخلیق کا حسن دوبالا ہوگیا ہے۔ دوسری جانب وادی نیلم اور لیپا کے پہاڑوں پر بھی ہر جانب برف ہی برف نظر آ رہی ہے۔
آزاد کشمیر میں حالیہ بارش اور پہاڑوں پر برفباری کی وجہ سے سردی میں اضافہ ہو گیا ہے۔
