لاہور: پاکستان کرکٹ بورڈ نے سلمان بٹ کو سلیکشن کنسلٹنٹ کے عہدے سے ایک دن کے بعد ہی فارغ کردیا۔
قومی کرکٹ ٹیم کے چیف سلیکٹر وہاب ریاض نے پریس کانفرنس میں کہا ہے کہ سلمان بٹ کا نام واپس لے لیا ہے اور وہ میری ٹیم کا حصہ نہیں ہوں گے، نہیں چاہتا کہ سلمان بٹ سے متعلق غلط باتیں کی جائیں۔
چیف سلیکٹر نے کہا کہ دورہ آسٹریلیا کے لیے ٹیم سلیکشن میں سلمان بٹ کا کوئی کردار نہیں تھا۔ انہوں نے تصدیق کی کہ یکم جنوری سے اسد شفیق بطور کنسلٹنٹ سلیکشن کمیٹی ممبر ذمے داریاں انجام دیں گے۔
واضح رہے کہ پی سی بی نے گزشتہ روز سابق کرکٹرز کامران اکمل، راؤ افتخار انجم اور سلمان بٹ کو چیف سلیکٹر وہاب ریاض کا کنسلٹنٹ مقرر کیا تھا۔
