مظفرگڑھ کی تحصیل علی پور میں غربت اور بیروزگاری سے تنگ شخص نے ٹوکے کے وار کر کے اپنی بیوی اور 7 بچوں کو بے دردی سے قتل کر دیا۔
مقتول بچوں کی عمریں 6 ماہ سے 8 سال کے درمیان ہیں، بیوی اور بچوں کو قتل کرنے کے بعد ملزم نے خود کو پولیس کے حوالے کر دیا۔
پولیس کے مطابق ہولناک قتل کا واقعہ تحصیل علی پور کے علاقے مڈ والا میں پیش آیا جہاں سجاد کھوکھر نامی شخص نے تیز دھار آلے سے اپنی بیوی اور 7 معصوم بچوں کو ایک ایک کر کے بے دردی سے قتل کر دیا۔
پولیس کے مطابق قتل ہونے والوں میں ملزم کی 40 سالہ بیوی کوثر مائی، 8 سالہ انسہ، 7 سالہ کنزہ، 6سالہ رمشا، 4 سالہ مہناز، 2 سالہ انس، 3 سالہ سبحان اور 6 ماہ کی منزہ شامل ہیں۔
دوسری جانب وزیرِاعلیٰ پنجاب مریم نواز شریف نے 8 افراد کے قتل کے واقعے کا نوٹس لے لیا۔ وزیراعلیٰ پنجاب نے علی پور میں پیش آنے والے افسوسناک واقعے پر انسپکٹر جنرل پولیس سے رپورٹ طلب کر لی ہے۔
