اسلام آباد: وزیراعظم محمد شہبازشریف نے ڈیرہ اسماعیل خان کے علاقے درابن میں کسٹم حکام کی گاڑی پر حملے کی شدید مذمت کی ہے۔
ایک بیان میں وزیراعظم نے کہا کہ دہشت گردی اور اسمگلنگ کے مکمل خاتمے تک دہشت گردی کے خلاف جنگ جاری رہے گی۔ انہوں نے کہا کہ ایسی بزدلانہ کارروائیاں حکومت کے عزم کو متزلزل نہیں کر سکتیں۔
وزیراعظم نے کہا کہ اپنے فرائض کی انجام دہی کے دوران وطن کے لیے جانیں دینے والے شہداء اپنے رب کے پاس زندہ ہیں۔
شہباز شریف نے سوگوار خاندانوں کے لیے دعا کی اور کہا کہ شہداء کے لواحقین کی ذمہ داری اب حکومت کی ہے۔
وزیراعظم نے چیئرمین فیڈرل بورڈ آف ریونیو کو ہدایت کی کہ وہ واقعے میں شہید ہونے والے اہلکاروں کے اہل خانہ کے لیے شہدا پیکج تیار کریں۔
