ڈی آئی خان:سیشن جج وزیرستان شاکر اللہ مروت کو نامعلوم افراد نے اغوا کرنے کے بعد ان کی گاڑی جلادی۔
خبر رساں اداروں کے مطابق وزیرستان میں تعینات سیشن جج شاکر اللہ مروت کے اغوا کی اطلاعات کے بعد وزیراعلیٰ خیبر پختونخوا علی امین گنڈاپور نے فوری نوٹس لیتے ہوئے آئی جی پولیس کے پی کے کو کارروائی کرتے ہوئے سیشن جج کو بازیاب کرانے کی ہدایات جاری کی ہیں۔
میڈیا ذرائع کے مطابق سیشن جج شاکر اللہ مروت کو ڈی آئی خان اور ٹانک کے درمیان نامعلوم مسلح افراد نے اغوا کیا اور اپنے ساتھ لے گئے۔ پولیس کے مطابق اغوا کرنے والوں نے سیشن جج کے محافظ کو چھوڑ دیا اور ان کی گاڑی کو جلا ڈالا۔
واقعے کی اطلاع ملتے ہی پولیس کی نفری جائے وقوع پر پہنچی اور راستے بند کرکے تلاش شروع کردی جب کہ جائے وقوع سے شواہد بھی اکٹھے کیے گئے ہیں۔
