کراچی: صوبائی وزیرِ سندھ شرجیل انعام میمن نے کہا ہے کہ پی ٹی آئی مذاکرات نہیں ڈیل کی درخواستیں دے رہی ہے۔
ایک بیان میں صوبائی وزیرِ سندھ شرجیل انعام میمن نے کہا کہ پی ٹی آئی مذاکرات نہیں ڈیل کی درخواستیں دے رہی ہے، مگر ادارے تیار نہیں۔
انہوں نے کہا ہے کہ اسلام آباد پر قبضے کی دھمکی سے ثابت ہو گیا، پی ٹی آئی کے وزیرِ اعلیٰ کے عزائم دہشت گردانہ ہیں، اداروں کے خلاف مہم چلانے والے کس منہ سے اداروں سے مذاکرات کی بات کر رہے ہیں۔
صوبائی وزیر نے کہا کہ پچھلے ڈیڑھ سال سے پی ٹی آئی کا ہر گروہ ڈیل کی درخواستیں دے رہا ہے، شہریار آفریدی کے بیان سے ظاہر ہوتا ہے یہ کیسے عوام کو بیوقوف بنا کر اداروں سے لڑاتے ہیں۔
ان کا کہنا تھا کہ پی ٹی آئی نے پہلے اداروں کے خلاف مہم چلائی اب انہیں سیاست میں دھکیل کر متنازع بنانا چاہتی ہے۔
شرجیل میمن کا مزید کہنا تھا کہ پی ٹی آئی والے پہلے سوشل میڈیا پر اب دارالحکومت میں دہشت گردی کی باتیں کر رہے ہیں۔
