بگوٹا: غزہ میں اسرائیلی جارحیت کے پیش نظر کولمبیا کے صدر گوستاوو پیٹرو نے اسرائیل کے ساتھ سفارتی تعلقات ختم کرنے کا اعلان کیا ہے۔
میڈیا رپورٹس کے مطابق کولمبیا کے صدر نے اسرائیلی حکومت کو نسل کش قرار دیتے ہوئے کہا ہے کہ ہماری آنکھوں اور انسانیت کے سامنے ایک پوری قوم کی نسل کشی کا دور دوبارہ نہیں آسکتا اور اگر فلسطین ختم ہوگیا تو انسانیت مر جائے گی۔
خیال رہے کہ کولمبیا کے صدر نے مارچ میں اقوام متحدہ کی سلامتی کونسل کی جانب سے غزہ میں جنگ بندی کی قرارداد منظور کیے جانے کے بعد متعدد مواقع پر اسرائیل کے ساتھ سفارتی تعلقات منقطع کرنے کا ارادہ ظاہر کیا تھا۔
واضح رہے کہ 7 اکتوبر 2023 سے جاری اسرائیلی جارحیت میں آئے روز اضافہ ہورہاہے، اقوام متحدہ کی سلامتی کونسل میں جنگ کی قرارداد منظور ہونے کے بعد بھی نہتے فلسطینیوں پر صہیونی فوجیوں کی مسلسل گولہ باری کا سلسلہ جاری ہے۔
