واشنگٹن: صہیونی ریاست اسرائیل کی قابض فوج فلسطین میں رفح پر حملے کے لیے امریکی بموں کا استعمال کر سکتی ہے، اس خدشے کے پیش نظر امریکا نے اسرائیل کو بموں کی فراہمی روک دی ہے۔
بین الاقوامی خبر رساں اداروں کے مطابق امریکی حکام کا کہنا ہے کہ اسرائیل کے لیے 2 ہزار پاؤنڈ وزنی 1800 بموں اور 500 پاؤنڈ وزنی 1700 بموں کی ترسیل روک دی گئی ہے اور ان کی خصوصی توجہ 2000 پاؤنڈ وزنی بموں کا استعمال روکنے اور گنجان آباد فلسطینی علاقوں میں ان بموں کے اثرات روکنے پر ہےجوغزہ کےدیگرعلاقوں میں دیکھےگئے ہیں۔
امریکی حکام کا کہنا ہے کہ رفح پر حملے کے اسرائیلی فیصلےکے بعد واشنگٹن نے ہتھیاروں کی فراہمی کا جائزہ لیا ہے، اور نتیجتاً رفح میں امریکی ہتھیاروں کےممکنہ استعمال پر 2 اقسام کے بموں کی کھیپ روکنےکا فیصلہ کیا گیا۔
واضح رہے کہ ایک ہفتہ قبل امریکی نیوز ویب سائٹ نے 2 اسرائیلی عہدے داروں کے حوالے سے خبر دی تھی کہ امریکا نے امریکی ہتھیاروں کی کھیپ اسرائیل جانے سے روکی ہے، تاہم وائٹ ہاؤس کی جانب سے اس پر کوئی تبصرہ نہیں کیا گیا تھا۔
