روم (انٹرنیشنل ڈیسک) جی 7 ممالک نے چین پر الزام لگایا ہے کہ وہ روس کی حمایت کرکے یوکرین کے خلاف جنگ کو مزید بڑھا رہا ہے۔ جی 7 ممالک کی میٹنگ اٹلی میں ہوئی جہاں میزبان اٹلی سمیت امریکا، برطانیہ، فرانس، کینیڈا، جرمنی اور جاپان کے سربراہان شریک ہوئے۔ جی 7 اجلاس میں سربراہان نے چین کے خلاف سخت موقف اختیار کرتے ہوئے کہا کہ چین کی جانب سے روس کے ڈیفنس انڈسٹریل بیس کو سپورٹ کرنے سے روس کو یوکرین میں اپنی غیر قانونی جنگ کو جاری رکھنے میں مدد مل رہی ہے جس کے بہت اہم اور وسیع تر سیکورٹی مضمرات ہیں۔ جی 7 ممالک نے مطالبہ کیا کہ چین روس کو ہتھیاروں اور دیگر جنگی سازوسامان کی فراہمی بند کرے جو روس کے ڈیفنس سیکٹر کو مدد دے رہی ہیں، بصورت دیگر چینی اداروں کو مختلف پابندیوں کا سامنا کرنا پڑسکتا ہے۔ واضح رہے روس اور یوکرین کے درمیان جنگ کا آغاز فروری 2022 ء میں ہوا تھا ۔
