اسلام آباد: وفاقی حکومت نے وفاقی سیکرٹری برائے توانائی راشد محمود لنگڑیال کو فیڈرل بورڈ آف ریونیو کا چیئرمین مقرر کرنے کا فیصلہ کیا ہے۔
ذرائع کا کہنا ہے کہ اسٹیبلشمنٹ ڈویژن نے منظوری کے لیے سمری وزیراعظم شہباز شریف کو بھجوا دی ہے۔
راشد لنگڑیال، جو ہارورڈ یونیورسٹی سے تعلیم یافتہ ہیں، ان کے پاس اہم انتظامی امور بشمول پبلک ایڈمنسٹریشن، بین الاقوامی ترقی، گروپ کے وسائل کو متحرک کرنے اور ترقیاتی پالیسیوں اور حکمت عملیوں کا تجربہ ہے۔
راشد محمود لنگڑیال اس سے قبل گلگت بلتستان کے چیف سیکرٹری بھی رہ چکے ہیں۔
وہ ایف بی آر کے سبکدوش ہونے والے چیئرمین امجد زبیر ٹوانہ کی جگہ لیں گے، جنہوں نے عہدے سے قبل از وقت ریٹائرمنٹ کی درخواست کی ہے۔
پچھلے مہینے، امجد زبیر ٹوانہ نے اپنا چارج چھوڑنے کے لیے دو ہفتے کا نوٹس بھی پیش کیا تھا۔
چیئرمین ایف بی آر نے وزیراعظم آفس کو خط بھی لکھا تھا جس میں وزیراعظم کو استعفیٰ دینے کے فیصلے سے آگاہ کیا گیا تھا۔ امجد زبیر ٹوانہ فروری 2025 میں ریٹائر ہونے والے تھے، تاہم، انہوں نے قبل از وقت ریٹائرمنٹ کا مطالبہ کیا ہے۔
