کراچی: گورنر سندھ کامران ٹیسوری نے کہا ہے کہ کارساز حادثے میں انصاف نہ ہوا تو بحیثیت گورنر متاثرہ خاندان کے ساتھ عدالت جاؤں گا۔
رپورٹ کے مطابق میڈیا سے گفتگو کے دوران کارساز حادثے میں جاں بحق باپ بیٹی کے گھر جا کر لواحقین سے تعزیت کرتے ہوئے کامران ٹیسوری نے کہا کہ دو جانیں چلی گئیں، ہمیں انصاف ہوتا ہوا نظر آنا چاہئے، کوئی بھی طاقتور ہو وہ اللہ سے نہیں بچ سکتا۔
انہوں نے کہا کہ یہ لوگ اپنا گزر بسر کسی کے آگے ہاتھ پھیلائے بغیر کررہے تھے، اگر انصاف ہوتا ہوا نظر نہیں آیا تو بحیثیت گورنر ان کے ساتھ عدالت جاؤں گا۔
گورنر سندھ کا کہنا ہے کہ چیف جسٹس سے اپیل کروں گا آپ بھی اس کیس کو مانیٹر کریں، کہیں انصاف ہوتے ہوتے رہ نہ جائے۔
