بھارت کی ریاست اترپردیش میں بھیڑیوں کے حملوں سے خوف زدہ عوام نے ایک کتے کو بھیڑیا سمجھ کر جان سے مار ڈالا۔
بھارتی میڈیا کے مطابق یادو پور گاؤں میں ایک 65 سالہ شخص اور اس کے 4 سالہ پوتے پر ایک کتے نے حملہ کیا جسے گاؤں والوں نے بھیڑیا سمجھ کر مار ڈالا۔
ڈویژنل فارسٹ آفیسر کے مطابق جب محکمہ جنگلات کے افسران نے تحقیقات کیں تو معلوم ہوا کہ یہ جانور بھیڑیا نہیں بلکہ ایک عام کتا تھا۔ گاؤں میں بھیڑیے کے کوئی ایسے نشان نہیں ملے جس سے معلوم ہوسکے یہ بھیڑیا تھا۔
یاد رہے کہ اس علاقے میں مارچ سے بھیڑیوں کے حملے جاری ہیں اور جولائی سے اب تک ان حملوں میں 7 بچوں سمیت 8 افراد ہلاک ہو چکے ہیں جبکہ درجنوں افراد زخمی ہو چکے ہیں۔
بارش کے موسم میں بھیڑیوں کے حملوں میں اضافہ ہوا ہے، جس کی وجہ سے مقامی لوگوں میں شدید خوف پایا جاتا ہے۔
