اسرائیلی فوج ایک طرف تو لبنان اور غزہ میں مظالم ڈھانے پر تُلی ہوئی ہے اور نہتے شہریوں کو قتل کرکے جشنِ فتح منانے میں مصروف ہے اور دوسری طرف اسرائیل کے وزیرِاعظم بنیامین نیتن یاہو کو حماس کے ہاتھوں یرغمالی بنے ہوئے اسرائیلیوں کے اہلِ خانہ کی طرف سے لعن طعن کا سامنا ہے۔
اسرائیل پر حماس کے حملوں کا ایک سال مکمل ہونے کے حوالے سے منعقدہ تقریب سے خطاب کے دوران بنیامین نیتن یاہو کو اُس وقت شدید سُبکی کا سامنا کرنا پڑا جب یرغمالیوں کے اہلِ خانہ نے اُن کے خلاف احتجاج کرتے ہوئے نعرے بلند کیے اور ان سے کہا کہ کچھ تو شرم کرو، ایک سال ہوگیا ہے اور ہمارے پیارے اب تک حماس والوں کے پاس ہیں۔
اسرائیلی وزیرِاعظم کو یرغمالیوں کے اہلِ خانہ کی طرف سے لعن طعن کے باعث تقریر روکنا پڑی۔ متاثرین کے اہلِ خانہ نے کہا کہ اب حماس سے جنگ بندی ہو جانی چاہیے تاکہ قیدیوں کے تبادلے میں اُن کے پیاروں کی رہائی کی بھی گنجائش پیدا ہو۔
