پاکستان تحریکِ انصاف کے رہنما شبلی فراز نے کہا ہے کہ خوش قسمتی سے ہمیں پشاور ہائی کورٹ میں انصاف مل جاتا ہے۔
پشاور میں میڈیا سے گفتگو کرتے ہوئے پاکستان تحریکِ انصاف کے رہنما شبلی فراز نے کہا کہ مشہور ترین سیاسی جماعت کے ساتھ برا سلوک کیا جارہا ہے، ایسے سلوک کے مثبت نتائج برآمد نہیں ہوں گے،
ہمیں اندازہ نہیں تھا کہ احتجاج میں ہمارا استقبال گولیوں سے ہو گا، ہمارے ساتھ ایسا سلوک کیا گیا جیسے ہم پاکستان کے باشندے نہیں،،ہمارے 12 افراد شہید ہوئے، دیگر تفصیلات جمع کر رہے ہیں۔
انہوں نے کہا کہ جوڈیشل انکوائری ہونی چاہیے تاکہ ذمے داروں کو سزا مل سکے، اس ملک کے پُرامن شہریوں کو اپنی جان گنوانا پڑا ، پُرتشدد واقعات میں ملوث ہونے کا سبق ہمیں نہیں دیا گیا ہے،اگلے لائحہ عمل کا اعلان بانیٔ پی ٹی آئی ہی کریں گے۔
شبلی فراز نے کہا کہ ہمارے رہنماؤں اور کارکنوں کے خلاف سنگین دفعات کے تحت مقدمات درج کیے گئے، ملک کے لیے سیاسی استحکام چاہیے، ہمارا قصور یہ تھا کہ ہم کے پی سے تھے، ایسے رویے سے فائدہ ان کا ہوتا ہے جو ملک کی بھلائی نہیں چاہتے۔
