مشیرِ اطلاعات خیبر پختون خوا بیرسٹر سیف کا کہنا ہے کہ کرم معاہدے کے مطابق بنکرز گرانے کے بعد لشکر کشی کرنے والے فریق کو دہشت گرد سمجھ کر کارروائی کی جائے گی۔
اپنے بیان میں مشیرِ اطلاعات خیبر پختون خوا بیرسٹر سیف نے کہا کہ ایپکس کمیٹی کے فیصلے کی روشنی میں علاقے کو اسلحے اور بنکرز سے پاک کیا جائے گا۔
ان کا کہنا تھا کہ کرم میں اسلحہ جمع کرنے کے لیے فریقین 15 دنوں میں مربوط لائحہ عمل دیں گے،کرم معاہدے کے مطابق کرم میں اسلحے کی آزادانہ نمائش اور استعمال پر پابندی ہو گی۔
انہوں نے کہا کہ اسلحہ خریدنے کے لیے کرم میں چندہ جمع کرنے کی اجازت نہیں ہوگی، کرم میں پہلے سے موجود بنکرز 1 ماہ میں ختم کیے جائیں گے
بیرسٹر سیف نے مزید کہا کہ کرم معاہدے کے مطابق بنکرز گرانے کے بعد لشکر کشی کرنے والے فریق کو دہشت گرد سمجھ کر کارروائی کی جائے گی، کرم میں فریقین کے ہر قسم کے بنکرز کی تعمیر پر پابندی ہو گی۔
