کراچی: پاکستان میں آج منگل کے روز انٹرنیٹ استعمال کرنے والوں کو سست روی اور جزوی بندش کا سامنا کرنا پڑے گا۔
بین الاقوامی انٹرنیٹ کیبل نیٹ ورک میں اہم مرمتی کام کا آغاز ہو چکا ہے۔ اس حوالے سے پی ٹی سی ایل تکنیکی ٹیم کے مطابق یہ ٹیکنیکل سرگرمی عالمی سطح پر بچھائی گئی زیرِ سمندر کیبل میں نصب ایک اہم رپیٹر کی مرمت کے لیے کی جا رہی ہے۔
ترجمان کے مطابق بین الاقوامی کیبل کنسورشیم نے اس کام کی مرمت آج 14 اکتوبر کو صبح 11 بجے شروع کرنے کا شیڈول جاری کیا ہے، جو تقریباً 18 گھنٹے تک جاری رہنے کا امکان ہے۔ اس دوران ملک کے مختلف حصوں میں انٹرنیٹ کی رفتار متاثر ہو سکتی ہے، جبکہ بعض علاقوں میں سروس جزوی طور پر معطل بھی رہ سکتی ہے۔
پی ٹی سی ایل کے ترجمان کا کہنا ہے کہ یہ مرمتی عمل مستقبل میں انٹرنیٹ نیٹ ورک کو مزید مستحکم اور مؤثر بنانے کے لیے ضروری ہے۔ یہ کام سروس کے معیار اور تسلسل کو برقرار رکھنے کے لیے ناگزیر ہے، جس کے دوران صارفین کو عارضی مشکلات کا سامنا ہو سکتا ہے۔
ترجمان نے صارفین سے پیشگی معذرت کرتے ہوئے یقین دہانی کرائی ہے کہ جیسے ہی مرمت مکمل ہوگی، سروس کو مکمل طور پر بحال کر دیا جائے گا۔ کمپنی کا کہنا ہے کہ مرمتی عمل کے اختتام کے بعد انٹرنیٹ کی رفتار اور کارکردگی پہلے سے بہتر ہو جائے گی۔
اس دوران ماہرین کا مشورہ ہے کہ صارفین غیر ضروری ڈاؤن لوڈ، آن لائن گیمز اور ویڈیو اسٹریمنگ سے گریز کریں تاکہ سروس میں کم سے کم رکاوٹ پیش آئے۔
