اسلام آباد میں پاکستان ٹیلی کمیونیکیشن لمیٹڈ (پی ٹی سی ایل) نے اعلان کیا ہے کہ سمندری کیبل میں نصب رپیٹر کی مرمت مکمل کرلی گئی ہے جس کے بعد ملک بھر میں انٹرنیٹ کی رفتار اور کنیکٹیویٹی بحال ہوگئی ہے۔
پی ٹی سی ایل کے مطابق بین الاقوامی کیبل کنسورشیم نے 14 اکتوبر کی صبح مرمتی کام شروع کیا تھا، جو کامیابی سے مکمل کرلیا گیا۔ اس مرمت کے بعد انٹرنیٹ سروس معمول پر آچکی ہے اور صارفین کو درپیش سست رفتار یا منقطع کنکشن کے مسائل ختم ہوگئے ہیں۔
یاد رہے کہ گزشتہ روز پی ٹی سی ایل نے شہریوں کو انٹرنیٹ متاثر ہونے سے متعلق آگاہ کیا تھا اور مرمتی عمل کے دوران عارضی خلل کی نشاندہی کی تھی۔
