کوئٹہ: سرکاری اعداد و شمار کے مطابق بلوچستان کی مختلف جامعات میں مجموعی طور پر 201 افغان طالب علم زیر تعلیم رہے، جن میں جامعہ بلوچستان میں 84، بیوٹمز میں 59، لورالائی یونیورسٹی میں 22 اور سردار بہادر خان ویمن یونیورسٹی میں 36 طالبات شامل تھیں۔
وفاقی حکومت کی جانب سے افغانستانی باشندوں کے انخلا کے فیصلے کے بعد ان میں سے زیادہ تر طلبہ و طالبات اپنی تعلیم ادھوری چھوڑ کر واپس وطن جا چکے ہیں جبکہ جامعات کی جانب سے تمام افغان طلبہ کو افغانستان جانے کی ہدایت بھی دی جا چکی ہے۔
یونیورسٹیز انتظامیہ کے مطابق افغان طلبہ پاکستان واپس آکر تعلیم اس وقت ہی جاری رکھ سکیں گے جب وہ افغانستان سے پاکستانی ویزا حاصل کریں۔
ادھر بلوچستان کی جامعات نے رواں سال افغان طلبہ کو مختلف شعبہ جات میں دیے جانے والے کوٹے کو بھی ختم کر دیا ہے۔
