دمشق:شام کے وزیر خارجہ اسعد الشیبانی نے جمعہ کے روز اقوام متحدہ، عرب اور اسلامی ممالک سے مطالبہ کیا ہے کہ وہ اسرائیل کی بار بار کی جارحیت کے خلاف فوری اقدامات کریں، انہوں نے اسرائیل کے بیعت جن کے شہر پر حملے کو شہریوں کے خلاف جان بوجھ کر کی جانے والی کارروائی قرار دیا۔
شام کے وزیر خارجہ نے کہا کہ اسرائیلی حملہ “غدارانہ اور جان بوجھ کر عام شہریوں کو نشانہ بنانے والا” تھا۔ انہوں نے خبردار کیا کہ اس طرح کے حملے خطے میں امن و سلامتی کے لیے خطرہ ہیں اور بین الاقوامی برادری کی خاموشی جارحیت کرنے والے کو مزید جرائم کرنے کی حوصلہ افزائی کرتی ہے۔
انہوں نے اقوام متحدہ، سلامتی کونسل اور تمام عرب و اسلامی ممالک پر زور دیا کہ وہ اپنی ذمہ داریاں ادا کریں اور اسرائیل کی اس جارحیت کے خلاف کارروائی کریں۔
میڈیا رپورٹس کے مطابق اسرائیل کے حملے میں کم از کم 13 افراد ہلاک اور 24 زخمی ہوئے، جن میں خواتین اور بچے بھی شامل ہیں۔ اسرائیلی فوج نے دعویٰ کیا کہ حملے کے دوران چھ فوجی زخمی ہوئے، جن میں تین کی حالت تشویشناک ہے اور جماعة اسلامیہ کے کچھ افراد کو گرفتار کیا گیا ہے۔
اطلاعات کے مطابق نومبر میں اسرائیلی فوج نے جنوبی شام میں 47 آپریشن کیے جبکہ دسمبر 2024 سے اب تک اسرائیل نے ایک ہزار سے زائد فضائی حملے اور 400 سے زائد سرحد پار کارروائیاں کی ہیں۔ بشار الاسد کے نظام کے خاتمے کے بعد اسرائیل نے گولان ہائیٹس کے غیر فوجی علاقوں پر قبضہ کر لیا، جو 1974 کے معاہدے کی خلاف ورزی ہے۔
