کوئٹہ میں ایک پھل فروش کے ہاں بیک وقت چار بچوں کی پیدائش ہوئی ہے۔
نجی ٹی وی کی رپورٹ کے مطابق کوئٹہ کے علاقے سیٹلائٹ ٹاؤن میں محنت کش شہری راز محمد کے گھر خوشیوں کا سماں باندھ گیا، جب ان کے ہاں ایک نجی اسپتال میں چار بچوں کی پیدائش ہوئی، تین بیٹے اور ایک بیٹی۔ خاندان اور محلے کے لوگ اس خیر و برکت پر دلی خوشی کا اظہار کر رہے ہیں۔
رپورٹ کے مطابق راز محمد پیشے کے اعتبار سے فروٹ کی ریڑھی لگاتے ہیں اور محنت مزدوری کے ذریعے اپنے اہلِ خانہ کا پیٹ پالتے ہیں، پہلے سے ان کے دو بچے تھے اور اب چار نئے مہمانوں کے شامل ہونے کے بعد بچوں کی مجموعی تعداد چھ ہو گئی ہے۔
اگرچہ چار بچوں کی پیدائش خوشیوں کا باعث ہے، لیکن محدود آمدنی کے پیشِ نظر والدین پر ذمہ داریوں کا بوجھ بھی بڑھ گیا ہے۔ بچوں کی مناسب پرورش، تعلیم اور روزمرہ ضروریات پوری کرنا ایک بڑا چیلنج بن چکا ہے۔
راز محمد نے وزیر اعلیٰ بلوچستان اور مخیر حضرات سے اپیل کی ہے کہ وہ ان کے بچوں کی بہتر کفالت اور دیکھ بھال کے لیے مدد فراہم کریں، تاکہ یہ محنت کش خاندان نئے آنے والے بچوں کے لیے بہتر مستقبل فراہم کر سکے۔
