کیڈٹ کالج جعفرآباد میں یومِ والدین کی ایک باوقار تقریب منعقد ہوئی جس میں آئی جی ایف سی بلوچستان (نارتھ) نے مہمانِ خصوصی کے طور پر شرکت کی۔
تقریب میں والدین کے ساتھ ساتھ ارکانِ قومی و صوبائی اسمبلی، کمشنر نصیر آباد، علاقائی عمائدین اور سول و ملٹری افسران بڑی تعداد میں موجود تھے۔
اس موقع پر کیڈٹس نے اعلیٰ نظم و ضبط اور پیشہ ورانہ تربیت کا مظاہرہ کرتے ہوئے شاندار پریڈ اور مختلف عملی سرگرمیاں پیش کیں، جنہیں والدین اور شرکاء نے بھرپور سراہا اور کیڈٹس کی خود اعتمادی اور معیارِ تربیت کی تعریف کی۔
تقریب سے خطاب کرتے ہوئے آئی جی ایف سی بلوچستان (نارتھ) نے کیڈٹ کالج جعفرآباد کے تعلیمی اور تربیتی نظام کو قابلِ تعریف قرار دیا۔
ان کا کہنا تھا کہ کیڈٹ کالج جعفرآباد جیسے ادارے نوجوان نسل میں نظم و ضبط، مضبوط کردار اور حب الوطنی کے جذبے کو فروغ دے رہے ہیں۔
تقریب کے دوران کیڈٹس نے اپنے جذبات کا اظہار کرتے ہوئے کہا کہ انہیں کیڈٹ کالج جعفرآباد میں تعلیم حاصل کرنے پر فخر ہے اور ان کے والدین کو بھی اس بات پر فخر ہونا چاہیے کہ ان کے بچے ایک معیاری اور باوقار ادارے کا حصہ ہیں۔
