لاہور: وزیر اعلیٰ پنجاب مریم نواز نے کہا ہے کہ اگر پنجاب کی بیٹیاں عزم اور حوصلے کے ساتھ قدم اٹھائیں تو وہ نہ صرف اپنی بلکہ پورے صوبے کی تقدیر بدل سکتی ہیں۔ انہوں نے خواتین کی صلاحیتوں کو سراہتے ہوئے کہا کہ پنجاب کی خواتین کسی سے کم نہیں اور محنت کے ذریعے ہر مقصد حاصل کر سکتی ہیں۔
ایک تقریب سے خطاب میں مریم نواز نے بتایا کہ حکومت نے عوام کے لیے صحت کی سہولتیں گھر گھر پہنچانے کا منصوبہ بنایا ہے، تاکہ لوگ اسپتال جانے کی زحمت نہ اٹھائیں، 25 ہزار کمیونٹی ہیلتھ انسپکٹرز میدانِ عمل میں آئیں گی، فیلڈ اسپتال دیہات میں جا کر علاج فراہم کریں گے اور ستھرا پنجاب منصوبہ عالمی سطح پر بھی پذیرائی حاصل کر چکا ہے۔
وزیر اعلیٰ نے کہا کہ کمیونٹی ہیلتھ ورکرز کی موجودہ تنخواہ 50 ہزار روپے ہے، تاہم کارکردگی دکھانے والے ورکرز کی تنخواہ بڑھائی جائے گی، تاکہ اچھا کام کرنے والوں کی حوصلہ افزائی ہو۔
انہوں نے بتایا کہ صوبے میں کارڈیالوجی کے نئے اسپتال بھی قائم کیے جا رہے ہیں، جن میں جھنگ جیسے شہروں میں بھی جدید کارڈیالوجی اسپتال شامل ہیں، جو ماضی میں تصور سے باہر تھا۔
اپنے خطاب کے آخر میں مریم نواز نے کہا کہ آج ایک مریم آپ کے سامنے کھڑی ہے اور میرے سامنے آپ سب مریم کھڑی ہیں اور خواتین کی حوصلہ افزائی کرتے ہوئے ان پر اعتماد کا اظہار کیا۔
