پنجاب کے مختلف علاقوں میں آج بھی شدید دھند کے باعث حدِ نگاہ انتہائی کم ہو گئی ہے، جس کے نتیجے میں متعدد موٹرویز کو ٹریفک کے لیے بند کر دیا گیا ہے۔
موٹروے پولیس کے مطابق حفاظتی اقدامات کے تحت موٹروے ایم ٹو ٹھوکر نیاز بیگ سے کوٹ مومن تک دھند کی وجہ سے بند ہے۔
اسی طرح موٹروے ایم تھری فیض پور سے درخانہ تک جبکہ موٹروے ایم فور شیر شاہ سے فیصل آباد تک ٹریفک کے لیے بند کر دی گئی ہے۔ موٹروے پولیس کا مزید کہنا ہے کہ موٹروے ایم فائیو سکھر سے شیر شاہ تک اور موٹروے ایم الیون لاہور سے سمبڑیال تک بھی شدید دھند کے باعث بند ہے۔
موٹروے پولیس نے شہریوں کو ہدایت کی ہے کہ غیر ضروری سفر سے گریز کریں، حدِ رفتار کم رکھیں اور دھند چھٹنے تک محفوظ مقامات پر قیام کریں تاکہ کسی بھی ناخوشگوار حادثے سے بچا جا سکے۔
