اسلام آباد: وزیراعظم شہباز شریف نے کمیونسٹ پارٹی آف چائنا کے بین الاقوامی شعبے کی نائب وزیر سن ہائی یان سے ملاقات میں کہا ہے کہ پاکستان کا چین کے ساتھ تعلق ہر حال میں مضبوط اور غیرمتزلزل رہے گا، پاکستان ایک چین پالیسی پر قائم ہے اور دونوں ممالک کے تعلقات فولاد کی طرح مضبوط ہیں۔
وزیراعظم ہاؤس میں ہونے والی ملاقات کے دوران وزیراعظم نے چینی مہمان اور ان کے وفد کا استقبال کیا اور دونوں ممالک کے سفارتی تعلقات کی 75ویں سالگرہ کی اہمیت پر روشنی ڈالی۔ انہوں نے کہا کہ رواں سال کے آغاز میں پاکستان کے نائب وزیراعظم اور وزیر خارجہ کا بیجنگ کا دورہ کامیاب رہا، وزیر داخلہ نے شنگھائی کا دورہ کیا اور جلد اسپیکر قومی اسمبلی کا دورہ چین متوقع ہے۔
اقتصادی تعاون پر بات کرتے ہوئے وزیراعظم نے کہا کہ چین کی جانب سے پاکستان کو پاک-چین اقتصادی راہداری (سی پیک) کے تحت دی جانے والی معاونت کی تعریف کی جانی چاہیے اور سی پیک کے اگلے مرحلے کو بروقت اور مؤثر طریقے سے مکمل کرنا ضروری ہے۔ انہوں نے صدر شی جن پنگ کو اس سال پاکستان کے سرکاری دورے کی دعوت بھی دی۔
چینی نائب وزیر سن ہائی یان نے وزیراعظم کا شکریہ ادا کرتے ہوئے کہا کہ چین پاکستان کے ساتھ اپنے دیرینہ تعلقات کو مضبوط بنانے کے لیے پرعزم ہے۔ انہوں نے پاکستان میں اقتصادی اور سیاسی استحکام کے لیے وزیراعظم کی کوششوں کو سراہا تے ہوئے کہا کہ چینی قوم پاکستان کی سفارتی کامیابیوں پر فخر محسوس کرتی ہے۔
