امریکی صدر ڈونلڈ ٹرمپ نے کہا ہے کہ امریکا ایران سے متعلق اپنے سیاسی عزائم مشرقِ وسطیٰ کے اتحادی ممالک کے ساتھ شیئر نہیں کرتا۔
امریکی ٹی وی کو دیے گئے انٹرویو میں صدر ٹرمپ کا کہنا تھا کہ امریکا ایران کے ساتھ مذاکرات جاری رکھنا چاہتا ہے اور ان بات چیت کو کسی نتیجے تک پہنچانے کی کوشش کی جا رہی ہے۔ انہوں نے کہا کہ منصوبہ یہی ہے کہ ایران مذاکرات کرے، اس کے بعد دیکھا جائے گا کہ کیا پیش رفت ممکن ہے، ورنہ حالات کا جائزہ لیا جائے گا۔
صدر ٹرمپ نے ایک مرتبہ پھر جنگی جہازوں کا حوالہ دیتے ہوئے کہا کہ ایک بڑا امریکی بحری بیڑہ ایران کی جانب بڑھ رہا ہے۔
حالیہ مذاکرات کے حوالے سے ان کا کہنا تھا کہ ایران سے متعلق امریکا اپنی سیاسی حکمتِ عملی مشرقِ وسطیٰ کے اتحادیوں کو آگاہ نہیں کرتا۔
واضح رہے کہ ایک روز قبل صدر ٹرمپ نے کہا تھا کہ ایرانی حکام کسی معاہدے کو نتیجہ خیز بنانا چاہتے ہیں اور ڈیڈ لائن کے بارے میں صرف وہی جانتے ہیں کہ کوئی حتمی وقت مقرر ہے یا نہیں۔
