حویلی لکھا میں پولیس کی مشترکہ گشت کے دوران فائرنگ کا افسوسناک واقعہ پیش آیا، جس میں ایس ایچ او ستگھرہ سب انسپکٹر طارق اپنے ہی ساتھی کی گولی لگنے سے زخمی ہوگئے۔
واقعہ اس وقت پیش آیا جب پولیس اہلکار معمول کے مطابق علاقے میں گشت کر رہے تھے۔
پولیس کے مطابق کانسٹیبل عبداللہ کی جانب سے کی گئی فائرنگ کے نتیجے میں ایس ایچ او طارق زخمی ہوئے، جنہیں فوری طور پر طبی امداد کے لیے قریبی اسپتال منتقل کر دیا گیا۔ ڈاکٹرز کے مطابق زخمی افسر کی حالت خطرے سے باہر بتائی جا رہی ہے۔
پولیس کا کہنا ہے کہ واقعے کے فوراً بعد کانسٹیبل عبداللہ موقع سے فرار ہوگیا، جس کی گرفتاری کے لیے خصوصی ٹیمیں تشکیل دے دی گئی ہیں۔ پولیس نے یقین دہانی کرائی ہے کہ ملزم کو جلد گرفتار کر کے قانون کے مطابق کارروائی کی جائے گی۔
