ترکیہ میں آکن گرلگ کی بطور وزیرِ انصاف تقرری کے بعد پارلیمنٹ کا اجلاس شدید ہنگامہ آرائی کی نذر ہوگیا۔
اپوزیشن جماعتوں نے ان کی نامزدگی پر سخت اعتراض کرتے ہوئے ایوان میں احتجاج کیا، جس دوران بعض اراکین کے درمیان ہاتھا پائی بھی ہوئی اور ایک دوسرے پر گھونسوں اور لاتوں کی بوچھاڑ کی گئی۔ اپوزیشن اراکین نے آکن گرلگ کو حلف اٹھانے سے روکنے کی کوشش کرتے ہوئے مؤقف اختیار کیا کہ ان کی تقرری متنازع اور قابلِ اعتراض ہے۔
یاد رہے کہ آکن گرلگ اس سے قبل چیف پراسیکیوٹر کے طور پر اپوزیشن کے خلاف کریک ڈاؤن کی قیادت کر چکے ہیں، جس کے باعث ان کی بطور وزیرِ انصاف نامزدگی نے سیاسی درجہ حرارت مزید بڑھا دیا ہے۔
دوسری جانب حکومتی اراکین نے صدر رجب طیب اردوان کے فیصلے کا دفاع کرتے ہوئے کہا کہ آکن گرلگ نے ہمیشہ قانون کے دائرے میں رہتے ہوئے فرائض انجام دیے ہیں، تاہم اپوزیشن نے اس تقرری کو جمہوری اقدار اور شفافیت کے اصولوں کے منافی قرار دیا ہے۔
